بہاولپور:کمشنر بہاول پور ڈویژن کیپٹن محمد ظفر اقبال نے سر صادق محمد خان عباسی ہسپتال بہاولپور کااچانک دورہ کیا۔انہوں نے ہسپتال کے مختلف شعبہ جات بشمول شعبہ بیرونی مریضاں اور شعبہ ایمرجنسی کا بھی معائنہ کیا اور موقع پر موجود مریضوں اور ان کے لواحقین سے دستیاب طبی سہولیات بارے استفسار کیا۔انہوں نے ہسپتال میں موجود ادویات کا سٹاک، سٹاف کی حاضری،علاج معالجہ کے حوالہ سے دستیاب طبی سہولیات اور صفائی ستھرائی کا معائنہ کیا۔انہوں نے مریضوں اور ان کے لواحقین کے قیام کے لئے مختص جگہوں پر ٹھنڈے پانی کی سہولت کی فراہمی کو یقینی بنانے کی ہدایت کی۔ انہوں نے موقع پر موجود افسران کو ہدایت کی کہ اپنے فرائض منصبی جذبہ حب الوطنی اور انسانیت کی خدمت کے جذبہ سے سرشار ہو کر انجام دیں۔انہوں نے کہا کہ فرائض کی انجام دہی میں کسی قسم کی غفلت اور کوتاہی ہرگز برداشت نہیں کی جائے گی۔انہوں نے کہا کہ عوام الناس کو سستی اور معیاری طبی سہولیات کی فراہمی حکومت پنجاب کا اولین مقصد ہے اور اس سلسلہ میں کوئی دقیقہ فروگذاشت نہیں کیا جائے گا۔اس موقع پرپرنسپل قائد اعظم میڈیکل کالج پروفیسر ڈاکٹرشہزاد انور، ایڈیشنل کمشنر رابطہ محمد فیصل عطا، اسسٹنٹ کمشنر بہاولپور سٹی نعیم صادق چیمہ، ایڈیشنل کمشنر کنسالیڈیشن طارق محمودبخاری اور ایم ایس سول ہسپتال سمیت دیگر متعلقہ افسران موجود تھے۔
